Lalu reti gaya gambar enggau tuju ukir nya ke digaga ba tuboh kitai Iban siko-siko nya mega bisi ngembuan reti ti bebeda nitih ka gaya gamal gambar ukir nya digaga. Lalu gambar baka bansa burong tauka jelu ti mangah, tauka bansa ular ti bisa nya mandang ka gaya pengering enggau pengeras ati orang ti beempu tuboh alai ukir nya digaga. Tang bansa gambar ukir ka baka tu nitih ka tusoi penemu tuai kitai bansa Iban mega mesti ka digaga ka siti gambar gamal utai bukai ke mesti nyadi ka pemakai jelu, burung tauka ular nya. Lalu kebuah gambar utai ka pemakai iya nya mesti ka digaga laban ngambi ka orang ti beempu tuboh nya enda bulih sial, tauka bulih penusah lalu tau lantang baka selama serta gerai nyamai udah bekau tuboh iya ke digaga ukir nya tadi.
Lalu baka ukir gambar bungai buah terung, tauka bungai utai tumboh, tauka ditulis ngena leka jako rama, tauka gambar bintang tauka bulan nya sigi gaya gambar ukir rama ke selalu digaga bansa kitai Iban bukai ketegal ti bisi ngembuan pengerindu ati ka pengawa beukir tu. Nyadi ukir ka baka tu nadai bisi penti pemali lalu mega nadai ngasoh orang ke beempu tuboh nya tau dikumbai alah ayu tauka sial.
Lalu gambar ukir ka baka gamal kitai mensia nya ukai bansa ukir asal kitai bansa Iban laban nya enda tau digaga ngapa ba tuboh kitai mensia enti orang ka beempu tuboh nya ukai orang ka tuai bulu tauka kering semengat.
Lalu baka nya mega gaya ukir ka ditulis orang ngena jako Jawi tauka jako Siam nya mega bisi tuju ti semina dikena sida ka beempu tuboh nya nyadi ka dinding bulu tauka dikumbai kitai kena sida iya nyaga diri kena ngadang nagang ari penusah ti tau datai nuntong sida empu.
Lalu bansa kitai Iban kelia tauka bala kitai ti bisi enggau orang gawa nyadi saldadu mega bisi ngaga ukir ba tuboh ti dikena sida iya nyaga diri tauka nyadi ka peransang ati maia sida iya gawa nyaga pengelikun menoa. Nyadi leboh sida iya ka ngaga ukir ba tuboh nya sida iya bisi ngulai linsu along ka dikena ngaga ukir nya enggau maioh macham bansa pengaruh ka nyadi ka dinding bulu; baka kebal, empelias enggau pengaruh bukai sereta mega enggau maioh macham bansa minyak sakang pengaruh. Kebuah utai tu digaga baka nya laban sida iya nangi ka diri nyangka tau enda ingat, tauka tetinggal ka pengaruh nya leboh maia besatup tauka betempuh belaban enggau munsoh. Nyadi enti pengaruh nya udah digulai enggau minyak ti lalu dichampur enggau linsu along nya tadi dia pengaruh nya tadi endang udah masuk dalam tuboh sida lalu dikembuan sida iya belama-lama nadai milih maia enggau endor.
Lalu asal bansa kitai Iban ka ngaga ukir ba tuboh tu rambau orang ka agi ngereja pengawa ngayau kelia iya nya laban kena sida iya nyamai ngelala ni bagi bansa kaban belayan tauka suku juru sida leboh rambau ngagyau nya kelia. Lalu bansa ukir ka nyau chelum digaga orang berengkah ari tunjuk jari nyentuk ka lengan orang ka indu nya dikumbai kitai Iban “Tegulun”. Reti “Tegulun” tu iya nya nanda ka indu tu ti bisi ngembuan ukir nya tau jari, tau takar tau gar, landik betenun landik ngembun, tauka dikumbai kitai indu ti landik ngereja semoa pengawa ke patut ditaga ngagai orang ka indu.
Lalu kitai lelaki bansa Iban ka bisi beukir ba tunuk jari ngagai lengan baka enggi orang ka indu nya tadi mega dikumbai orang “Guram”. Nyadi reti “Guram” tu iya nya nanda ka lelaki tu siko ari pungka lelaki ti tau ngereja semoa pengawa anak lelaki, baka tau kayau, tau mulau, tau serang sereta tau mega ngulu ka orang berumpang mungkal menoa. Lalu baka nya mega bansa kitai Iban ke bisi ngaga gambar ukir ba rekong ti dikumbai orang “Kelingai”. Reti jako “Kelingai” nya kena nanda ka kitai Iban ti bisi ngembuan ukir baka tu nya orang ti chukup kering ati laban jarang tauka nadai maioh kitai bansa Iban nakal ngasai ka pemedis ngaga gambar ukir ba rekong enti dibanding ka enggau ba isi tuboh kitai ka bukai.
Chara kitai Iban ngaga ukir ba tuboh tu iya nya ngena along tauka arok ke diambi ba burit kali ti lalu digulai enggau ai gula. Sereta mega jarum ti mit dua batang ka ditanchang ba pun jarum nya ngena benang. Nyadi jarum ka udah ditanchang tu mega lalu di kepit ngena kayu ti numbas iya pemesai ti tau nyadi ka pemegai ti ditanchang rat. Lalu mega siti agi kayu bukai numbas iya pemesai ka nyadi penatuk kena mantang kayu ka udah ditanchang enggau jarum nya tadi. Nyadi along tauka arok ka udah digulai enggau ai gula nya tadi lalu disimpan dalam burit mangkok ti numbas iya pemesai.
Nyadi bisi mega bansa kitai Dayak Iban ngumbai gambar ukir ka udah digaga ba tuboh kitai mensia nya tadi tau ka nyadi tampak terang enti leboh maia orang ka beempu tuboh nya parai. Nyadi ketegal nya mega petara lalu ngelala sida iya lalu nyamai mai samengat sida iya pulai ka sebayan leboh maia nya.
No comments:
Post a Comment