CHARA KITAI NENGAH JALAI DARAT ARI MIRI / BRUNEI / KOTA KINABALU

Maioh kitai ari menoa Sarawak sigi bisi ngembuan ati ka nguji nemuai nengah jalai darat ari menoa kitai di Sarawak tu lalu mansa menoa Brunei nyentok ka kitai datai ngagai menoa Sabah tauka nemuai ngagai Pulau Labuan.
Sebedau kitai ka nguji mindah ke Sabah mansa menoa Brunei kitai mesti dulu agi begaga ka passport kena kitai mansa menoa Brunei. Lalu passport nya bisi tiga iti bansa ke tau di kena kitai mansa menoa Brunei nya laban bisi sepuloh iti post imigration ke enda tau enda alai kitai ngetu ngechop passport kitai nya.
Nyadi siti ari bansa passport ke dikena nya, iya nya “Passport Antarabangsa”. Passport ke bansa tu iya nya berega RM300.00 lalu bisi ngembuan 48 lambar sereta tau dikena kitai dalam timpoh lima taun, lalu bisi mega iya ke berega RM100.00 lalu bisi ngembuan 48 lambar sereta ulih dikena kitai dalam timpoh dua taun aja, iya bechura mirah lalu tau dikena kitai nemuai ngagai semua menoa dalam dunya tu semina menoa Israel aja, lalu digaga ba opis imigration, lalu passport ke baka tu semina tau dikena siko aja.
Nyadi siti agi bansa passport nya, iya nya “Passport Lintas Batas” ti berega RM150.00 lalu iya bechura biru, lalu semina tau dikena kitai mansa antara menua Brunei nya aja, lalu iya tau dikena kitai dalam timpoh sepengelama lima tahun, lalu semina tau dikena siko aja. Nyadi siti agi bansa passport nya dikumbai orang “Surat Perjalanan Kumpulan Menganti Pasport” lalu kala mega dikumbai orang “Grouping Passport”. Passport ke baka tu berega RM200.00 siti, lalu iya bechura gadong, lalu tau dikena orang abis mimit lima iko lalu pengabis maioh tuboh iya nya dua puloh iko sekali mindah pulai mansang. Nyadi passport ke baka tu semina ulih dikena kitai mindah mansa menoa Brunei sekali aja.
Utai ke diguna kitai kena maia ngaga passport tu iya nya gambar kitai empu (gambar sais passport) dua keping, duitke chukup nitih ke gaya bansa passport ke ka digaga kitai nya , form kena ngaga passport nya ke diambi ari opis imigration ke nadai bebayar ti udah tembu di isi, surat pengada ke anembiak ti berumur kurang ari lapan belas tahun tauka orang ti kerja nyadi polis (bai iya ke asal enggau ti udah di photostat dua keping), bai photostat mykad dua keping lalu bai iya ti asal, lalu anak mit ke kurang ari umur lapan belas tahun ke nadai apai indai enggau mindah bebala maioh nya mesti ka bisi apai tauka indai iya enggau datai ngagai opis imigration leboh ke ka ngaga passport nya laban apai tauka indai anembiak nya ka dipinta nyain siti surat pemendar ti ngemendar ka anak sida nya mindah keluar ari menoa kitai Malaysia tu. Tang aku nangkan kita manah agi kita mai surat pengada kita leboh ke ka ngaga passport nya sereta orang ke bisi ngumbuan passport Malaysia ke udah abis timpoh dikena mesti mai passport sida ke lama nya, lalu enti passport nya udah lenyau tauka nadai temu tungga alai sida mesti ka ngaga repot pengelenyua nya ba sebarang alai Balai Polis, sereta mai copy Salinan Repot nya leboh ti ka ngaga passport nya baru.
Leboh ke ngaga passport tu semua sida ke ka enggau tauka apai indai sida mesti ka sampal datai magang ngagai opis imigration laban beguna ka chap tunjok indu jari sida iya maia ti ngaga nya. Nyadi passport tu ulih tembu di menoa Miri dalam timpoh sehari ari sebedau kitai ti ka mindah lalu iya semina ulih di kena dalam timpoh sebulan aja. Passport Antara bangsa ulih tembu dalam pengelama lebih kurang sejam aja. Tang kita tau betanya enggau silik agi ngagai opis imigration ke berimbai pendiau enggau kita dia. Nyadi kita mega mesti nukar duit Malaysia ngagai duit Brunei ti baka tu, satu ringgit Brunei sama rega enggau dua ringgit empat puloh sen duit Malaysia.
Nyadi penyauh pejalai ari Pasar Miri ngagai post imigration ba Sungai Tujuh iya nya tiga puloh tujuh kilometer. Post imigration tu tebuka berengkah ari pukul enam pagi nyentuk ka pukul sepuloh malam. Sebedau kita datai ba post imigration tu kita dulu agi meraka Jambatan Asean ti meraka Batang Baram ti sepenyauh satu kilometer lalu di pinta mayar RM10.00 ba plaza tol nya. Datai ba post imigration nya kita lalu nyua ke passport kita ambi ke di chop orang nanda ke kita udah keluar ari menoa Malaysia.
Ari post imigration Sungai Tujuh, Malaysia kita lalu meraka antara menua, lalu mansa Balai Polis Sungai Tujuh, Brunei. Udah nya baru kita datai ba Post Imigration Sungai Tujuh, Brunei lalu ngetu ngechop passport kita dia nanda ke kita udah masuk Brunei. Kita lalu minta form (Custom Clearence Form) ari opis kastam dia lalu ngisi form nya dia madah ke kita mai kereta Malaysia masuk ngagai menoa Brunei. Udah form imigration nya di chop kita lalu mupok baru. Ba menoa Brunei udang undang jalai raya sida terit bendar baka menoa Singapore. Lalu pengelaju kereta ti di kemendar ke ba menoa nya semina tujoh puloh kilometer sejam. Enti kita lebih laju ari nya lalu kita ka di pinta mayar saman ngena mata duit Brunei 300.00 tekala nya. Lalu semoa kereta ke masuk Brunei sigi enda tau ngena cheremin chelum tauka di pasang maioh macham sticker ke tau ngachau utai di peda ba cheremin moa tauka belakang kereta kelimpah ari roadtax aja. Isi penuh ka tangki minyak kita di Miri laban rega minyak di Brunei jauh mar ari menoa kitai.
Pejalai kita ari post tu lurus bendar lalu anang sekali kali nyimpang ngagai jalai kampung ke ba sepemanjai jalai. Udah nya kita ka meraka siti jambatan ke meraka Sungai Rasau, enda jauh ari Jambatan Rasau kita ka ngetu ba Plaza Tol Rasau lalu di pinta mayar tol tiga ringgit duit Brunei. Nyadi ba plaza tol sida iya sigi enggai nerima mata duit Malaysia kena bebayar.
Udah nya kira sepuloh kilometer udah mansa nya kita lalu datai ba simpang Kuala Belait. Udah mansa simpang Kuala Belait ti ari kiba jalai kita lalu lebih kurang dua puloh lapan kilometer lalu datai ba simpang Seria.
Udah mansa simpang Seria kita lalu anang sekali kali nyimpang ke bukai sampai kita nyau mansa alai Pangkalan Tentera Laut Diraja Brunei di Lumut. Udah mansa Lumut kita lalu mansa maioh kampung ti mit mit tang anang sekali kali nyimpang ari jalai highway nya. Perati ke tanda jalai laban ba menoa Brunei maioh tanda jalai ditulis ngena tulis jawi lalu enti kitai tesat kitai jarang bendar meda orang menoa nya bisi bejalai kaki sepemanjai jalai. Udah kita meda tanda jalai madah ke penyauh jalai ngagai Tutong kita lalu mesti berati ke tanda jalai Telisai tauka Tanjung Maya.
Kira ke sepenyauh dua kilometer sebedau datai ba simpang Tutong kita ka meda ba sepiak ari kanan jalai bisi maioh bendar tiang api letrik baka ke bisi semak Jambatan Batang Lupar ba menua kitai ditu tauka dikumbai orang “Transformer Lembaga Letrik Brunei”. Udah kita mansa nya kita ka ngambi jalai ari kanan sekali laban kita ka ngaga “U” Turn enda lama agi. Udah kita “U” Turn kita lalu masuk ngagai simpang jalai Tanjung Maya ari kiba. (Tu peda kita ba MAP “C”)
Tang enti kita bejalai lurus enda tepeda ka alai “U” Turn nya kita tau mega bejalai lurus tang anang masuk ngagai Tutong. Tang jalai tu jauh agi kira ke dua jam pejalai ari jalai Tanjung Maya. Kita lalu mansa Jerudong Park ke sebaka enggau Sunway Lagoon di Selangor. Ba tu kita enda tau laju lalu ingat anang masuk ke kiba jalai laban nya nuju ke Bandar Sri Bengawan tauka Muara. Kita mesti masuk ke kanan ba traffic light nya lalu masuk nuju ngagai jalai Temburong tauka Kuala Lurah. (Tu peda kita ba MAP “B”)
Nyambung pejalai ba MAP “C” kita udah masuk jalai Tanjung Maya mansa transformer nya tadi lalu bejalai lurus nyentuk ka kita tepeda ka simpang empat ke betentang enggau Balai Polis Lamunin. Udah tepeda ke Balai Polis Lamunin kita lalu masuk simpang ke kiba lalu bejalai lurus sampai ka kita tepeda ka siti sekula ti bechura gadong sepiak ari kiba jalai. Udah mansa sekula nya kita lalu berati ka siti sawmill kayu sepiak ari kanan jalai ti benanga ba Jalan Kecil Sungai Mitus. Kita lalu masuk Jalan Kecil Sungai Mitus ke semak sawamill kayu nya. Kita lalu meraka jambatan mit dua iti ke semina ulih di tengah sebuah kereta aja. Udah meraka jambatan ke mit nya kita lalu ka mansa SRK Sungai Mitus ke ba sepiak ari kiba jalai. Udah nya kita ka tepeda ka batang paip ai ti besai bendar sepemanjai jalai.
Kita lalu nitih ke tunga jalai ke bisi batang paip besai nya, nyentuk ka kita lalu tepeda ka umai paya ba nanga jalai ari kiba ti besimpang tiga. (Tu peda kita ba MAP “C”) lalu nangkup nya bisi rumah ke bechura oren ke besai ba atas bukit ari kanan jalai. Kita lalu masuk simpang jalai nya ti bisi niki bukit mimit. Sepiak rumah ke bechura oren nya bisi kedai runchit. Udah nya kita lalu bejalai lurus baru mansa jambatan Sungai Tajau. Sebedau jambatan Sungai Tajau kita ka mansa simpang Sekolah Vokesional Wawasan tauka Restoran Zaini Zainab ari kanan jalai.
Udah kita mansa semua alai tu kita lalu mansa siti round about tang kita mesti bejalai lurus laban simpang ke kiba nya nuju ngagai Bandar Sri Begawan. Udah nya kita lalu bejalai lurus baru sampai ke kita tetemu ka siti agi round about lalu ari sepiak round about nya bisi siti station minyak shell muak ke kanan jalai. Udah datai ba round about tu kita lalu masuk ke kanan lalu bejalai lurus sampai ke kita nyentuk datai ba Post Imigeration Kuala Lurah, Brunei. Ba tu mega kita mesti ngetu lalu ngechop passport baru ti ketiga kali nanda ke kita pansut ari menoa Brunei. Udah nya kita lalu datai ba Post Imigration Tedungan, Limbang. Ba ditu kita ka di pinta ngetu lalu ngechop passport kita baru nanda ke kita udah masuk baru ke Limbang, Sarawak.
Udah kita mansa Tedungan kita lalu mupok baru bejalai lurus nyentuk ke kita datai ba jalai simpang tiga. Ba Tedungan tu maioh alai orang bejual ka arak ke selalu didinga kitai berita ti murah bendar rega dibanding enggau ba menoa kitai ditu. Kita lalu masuk ke kiba jalai nuju ngagai pasar Limbang. Udah nya kita lalu bejalai lurus baru sampai ka kita tetemu baru ka simpang tiga lalu masuk ke kiba jalai baru laban jalai ti ke kanan nya nuju ngagai Ulu Medamit. Udah nya kita lalu bejalai lurus nyentuk ke datai di pasar Limbang. Sebedau datai ba pasar Limbang kita tau meli minyak ba station minyak Shell sebedau datai ba pasar. Datai ba pasar kita lalu bejalai lurus nebing ai sampai ka kita bisi tepeda ke traffic light ke semak market besai pasar Limbang. Udah mansa traffic light nya kita lalu masuk ngagai simpang ke kanan. Udah nya kita lalu ngetu baru ba simpang jalai semak Pasar Tamu Limbang lalu masuk ke kiba jalai ti nuju ngagai Padaruan. Pejalai ari Limbang ngagai Padaruan bisi dua puluh lima minit. (Tu peda kita ba MAP “D”)
Sebedau datai di Padaruan kita lalu mesti ngetu ba Post Imigration Padaruan laban ka ngechop passport kita nanda ke kita keluar ari Limbang. Udah nya kita lalu tetemu ka Sungai Padaruan ti nyadi ke antara menua enggau Temburong, Brunei. Kita lalu nepan ferry meraka Sungai Padaruan lalu dipinta mayar lapan ringgit duit Brunei tauka sepuloh ringgit duit Malaysia. Udah mansa ferry nya kita lalu mupok baru sampai ke kita tepeda ka Post Imigration Puni, Brunei ba sepiak ari kanan jalai lalu ngetu dia laban ngechop passport baru ti ke enam kali. (Tu peda ba MAP “D”)
Udah ngechop passport ba Post Imigration Puni kita lalu mansa pasar Temburong ti bisi jambatan tang bejalai lurus nitih ke jalai besai nya. Udah mansa menoa Temburong kita lalu datai ba Post Imigration Labu, Brunei lalu ngetu dia ngechop passport baru. Udah nya kita lalu mupok baru datai ke tepeda ka ferry ti dikena meraka Sungai Terusan. Ba Sungai Terusan tu kita dipinta mayar RM10.00, lalu diatu Jambatan Sungai Terusan, Lawas nya benong digaga perintah. Udah kita meraka Sungai Terusan kita lalu dipinta ngetu baru ba Post Imigration Mengkalap, Lawas lalu ngechop passport dia.
Udah ngechop passport dia kita lalu mupok baru lalu tepansa ke pasar Lawas. Ba pasar Lawas tauka Limbang kita tau ngetu meli minyak tauka makai laban maia nya enti kita angkat kira pukul enam pagi ari Miri sigi udah tengah hari lalu manah iya alai mela diri. Udah ngejang ke pasar Lawas kita lalu mansa Jambatan Batang Lawas lalu tepeda ke sungai nya ti manah bendar. Udah nya kita lalu bejalai kira ke dua puloh minit alai datai ba Post Imigration Merapok, Lawas. Datai ditu kita lalu ngechop passport baru lalu udah nya lalu bejalai ke kanan lalu ngechop passport ba Post Inigration Sindumin, Sepitang, Sabah. Nyadi post imigration tu ba siti bangunan semina kira ke beberapa depa aja bejalai kaki ngechop passport nya. Nyadi semua surat pejalai kita nya ka di simpan enggau manah lalu baka nya mega form kastam ke di ambi kita ba Post Kastam Sungai Tujoh, Brunei nya laban semua utai tu ka dikena kita leboh maia pulai ke Sarawak baru.
Udah ngejang ke Post Imigration Sindumin, kita lalu mansa pasar Sepitang, udah nya lalu bejalai lurus tang anang nyimpang ke kanan ti nuju ngagai menoa Tenom. Kira sejam ari nya kita lalu rembus ba pasar Beaufort, lalu mansa pasar nya. Udah mansa traffic light ba pasar Beaufort kita lalu tepeda ke siti simpang ti nuju ngagai Sungai Gerama muak ke kiba jalai. Nyadi jalai Sungai Gerama tu nuju ngagai menoa Menumbok ti nyadi ke jalai kitai ngelayang tasik nuju ke Labuan ngena ferry tauka speedboat. Tambang speedboat siko iya nya RM15.00 lalu kereta kita tau ditinggal ke dia lalu bayar orang nyaga kereta kita nya antara RM5.00 enggau RM10.00 sehari. Penyuah speedboat ke Labuan nya kira setengah jam sekali lalu pengabis iya pukul lima setengah lemai. Lalu ferry ari Menumbok ke Labuan semina dua kali sehari iya nya pukul tujoh pagi enggau pukul satu tengah hari.
Udah mansa simpang Sungai Gerama kita lalu bejalai lurusa mansa pasar Mengkabong, udah nya lalu simpang ngagai Kuala Penyu, udah nya simpang Bongawan, udah nya lalu simpang Kimanis. Ba tisi jalai menoa Kimanis tu maioh orang nyual pusu ke murah sampai RM15.00 sekilo lalu maioh mega nyual buah semangka. Udah mansa Kimanis kita lalu mansa simpang jalai ke Keningau muak ke kanan jalai.
Udah nya baru kita rembus ba round about ke besai bisi Tanjak Bansa Kedazan lalu masuik ke kiba tang enti kita bejalai lurus pan nadai salah laban nya sigi jalai lama orang nuju ngagai Kota Kinabalu. Udah kita masuk ke kiba kita lalu datai ba pasar Papar tang masuk ke kanan lalu lurus meraka Jambatan Sungai Papar, udah nya kita lalu bejalai lurus sampai ke mansa Beringgis Beach Resort sepiak ari kiba jalai enggau SMK Kinarut ba sepiak ari kanan jalai. Udah nya kita lalu datai ba Taman Lokawi lalu tepeda ka station minyak Shell ari kanan jalai. Udah nya lalu tepeda ke traffic light.
Udah nya kita lalu masuk ke kiba lalu bejalai nebing tasik lalu bisi meda Camp Tentera Lokawi. Udah mansa Camp Tentera Lokawi kita lalu rembus ba pasar Putatan. Udah mansa pasar Puitatan kita lalu tepeda ke siti fly over ke dikumbai Fly Over Petagas, lalu ari kiba fly over nya kita olih meda Airport Kota Kinabalu. Udah mansa airpot kita lalu bejalai lurus baru nyentok ka kita tepeda ka siti agi fly over ke dikumbai Fly Over tanjung Aru. Simpang ke kiba fly over nya nuju ngagai Tanjung Aru lalu nuju ke kanan nya jalai lama mansang ngagai Kota Kinabalu. Enti kita lalu bejalai lurus nya mega jalai nuju ngagai Kota Kinabalu ke baru dikumbai sida iya coastal highway. Kita lalu bejalai lurus datai ke kita tepeda ka siti agi fly over ke dikumbai Fly Over Keramunsing.Ari fly over tu kita udah selamat datai ngagai Kota Kinabalu lalu tau ngiga alai ngelantang ke ati diri. Tang rega sewa hotel enggau pemakai ba Kota Kinabalu tau dikumbai mar baka di Penang, iya jauh mar dibanding enggau menua kitai di Sarawak.
Aku arap ke semua kitai ari Sarawak tau nguji nemuai ngelantang kediri ngagai menua Sabah tu lalu enti kita ka ngiga alai orang ngaga setawak tauka engkerumong kita tau nemuai ke Kudat lalu sebedau datai di Kudat kita tau ngetu ba Kampung Sumangkap ke endang alai orang ngaga nya. Enti ka nemu agi tau nanya ngagai aku ila baka ni ko chara nemuai kin.