May 3, 2010

PENEMUAI NGAGAI GUA LONGHOUSE CHALET


Kira pukul dua lemai kemari 2 aribulan.May, 2010 laban ke kelalu angat diau di Miri ditu, dia aku enggau kami sebilik lalu bejalai nemuai ngagai siti alai endor kitai ka tau ngelantang ka ati sereta alai endor ka tau alai temuai bemalam ke suah agi didinga kami disebut orang ba menoa Miri ditu iya nya Longhouse Resort lalu nama endor tu iya ka bendar iya nya Gua Longhouse Chalet.

Nyadi penyauh Gua Longhouse Chalet tu ari pasar menoa Miri iya nya kira ka bisi limabelas minit kitai ngena kereta, lalu bejalai nengah jalai Tebing Tasik (Coastal Highway) ari Miri ke Bintulu, lalu endor nya kira bisi 400 meter ari Jambatan Kampung Bakam tauka dikumbai kitai ba antara menoa Kampung Bakam enggau menoa Kampung Siawak, lalu ba muak ari kiba kitai mansang ke Bintulu ngadap ngagai Tasik China Selatan.


Nitih ka cherita orang ke beempu endor tu iya nya Mr. John Linang, siko bansa kitai Iban ti berasal datai ari Lubok Antu ke udah badu gawa nyadi kunsil, kebuah iya ngaga endor temuai bemalam tu iya nya laban ngulih ka alai tu sunyi ari penginggar pasar menoa Miri lalu ngimbai tebing tasik ke manah alai kitai ngelantang ka ati.
Endor tu digaga dalam taun 2007 lalu udah dipejadi ka sapit kepala menteri Tan Sri Alfred Jabu.


Nyadi endor tu mega endang tanah tembawai asal bansa Jati Merek (siti bansa asal ke endang orang nguan menoa Miri) ke ulih iya meli, nya alai kebuah kitai bisi meda pun kayu ke besai lalu bisi kebun getah ba endor tu.


Nyadi ba alai tu mega iya bisi ngaga dua buah ruah ke digaga nunda teladan rumah panjai kitai Iban ari kayu lalu begantong ari tanah kira ka sepuloh kaki. Dinding rumah tu bisi nya digaga iya ari kulit kayu enggau buloh lalu begelegar ka kayu ampol.


Lalu siling rumah tu mega digaga iya ari buloh. Sebedau kitai niki ngagai rumah tu kitai bisi meda langkau alai engkah piring ke dikumbai “Langkau Penyukol tauka Langkau Ampun”. Lalu ba baroh rumah panjai tu bisi mega perau ke diengkah sida ba baroh rumah nya. Tangga kena kitai niki ngagai rumah panjai tu mega iya nya digaga ari lumpong kayu segala baka tangga rumah panjai kitai kelia dalam rambau taun 1970an tauka dulu agi ari nya.


Nyadi ba rumah ka dikumbai iya “Rumah Panjai Iban” nya bisi sembilan iti bilik lalu bisi mega bilik mandi, ruai enggau tanju. Nyadi ba rumah tu bisi tujoh iti bilik ke tau disewa kitai endor bemalam lalu gaya sewa iya semalam iya nya RM70.00. Dalam bilik tu bisi siti panggau (Katil) ke besai (double) lalu bisi mega iya ke ngena panggau mit dua iti (Single double bed) sereta jemari ke alai kitai besugu enggau jamban sereta bilik alai kitai mandi. Lalu semoa bilik tindok ditu bisi aircond magang.


Ba Rumah panjai Iban tu mega bisi digaga ka iya ruai ti besai nitihn ka sepemanjai rumah nya nunda gaya ruai rumah panjai kitai Iban ka bendar ti selalu nyadi ka alai orang ngaga pengerami baka makai selamat enggau melah pinang. Ba ruai tu mega maioh tandok rusa lalu dinding ukoi bisi diengkah ka iya pua kumbu ba setiap pintu bilik.


Kitai mega bisi meda kisar padi kitai Iban ti digaga ari lumpong kayu semak tempuan. Lalu bisi mega endor orang indu betenun, tampun antu pala sereta pandong ke dikena orang gawai batu. Lalu maioh mega rengka pengidup kitai Iban baka tugal burong, sangkoh, sumpit, serampang, selabit, sintong bebuah, lanji, terabai, kersang, ringka, isang, pemansai, lampu gas, tikai idas, lesong, alu enggau ranyai bisi diayan ka dalam ruai nya. Ba ruai tu mega bisi maioh bendar kipas angin ngambi ka kitai berasai lantang diau dia. Rumah Panjai Iban tu mega bisi tanju ke sama enggau pemanjai ruai nya tadi lalu lantang bendar nyadi ka alai kitai ngintu pengawa.



Lalu bisi rumah siti di kumbai iya “Rumah Dampa” ke sama beserimbai lalu sebaka nunda rumah panjai nya tadi tang digaga ari kayu sereta begantong. Rumah Dampa tu bisi enam iti bilik lalu bayar sewa bilik nya semalam RM50.00.



Rumah dampa tu bisi panggau besai (double bed) enggau panggau mit (single double bed). Lalu setiap bilik bisi bilik jamban enggau bilik mandi ka diri sereta bilik tu bisi ngena kipas angin. Ba rumah tu mega bisi ruai enggau tanju tang pemesai iya mit mimit ari iya ka ba Rumah Panjai Iban.



Lalu bisi mega sebuah rumah ke dikumbai iya “Maligai” ke tau nyadi ka alai kitai diau tang penyampau sewa iya semalam aku enda ingat nanya kemari laban rumah tu ke jauh agi ari alai rumah dua buah tu tadi lalu ba penatai kitai tama ngagai endor tu.


Ba Gua Longhouse Chalet tu mega bisi siti alai orang bejual ke utai empa enggau ai irup, sereta lalu bisi nyendia ka karoake ti lantang bendar endor ngelantang ka ati laban endor nya tampak angin ari tebing tasik sereta ayong ari panchar panas laban maioh kayu ti besai ngelinggi endor nya.



Alai endor kitai tau magang utai dempa pan bisi mega disedia ka dia. Lalu nitih ko padah iya kemari maioh orang ka bisi ngintu pengerami dia endang mai pemakai ka diri empu tang sida iya semina ngada ka kayu kena orang berapi aja.



Lalu ba penemu aku edor tu manah bendar enti orang ka ngereja pengawa melah pinang laban kitai ke diau ba nengeri enti nyewa hotel sigi jauh besai agi belanja sereta jam kitai ngintu pengerami pan diletak orang pengelama, lalu baka nya mega kitai ba nengeri ke diau ba genturong pendiau (housing estate) begulai enggau bansa bukai pan enggai tentu nyadi berami baka ke ba rumah panjai laban enti udah nyau jaoh malam tentu pangan ke beserimbai pendiau enggau kitai nya enda tentu lantang ati ninga kitai inggar chapoh betundi sampai ke tawas baka gaya uti kitai leboh melah pinang ba rumah panjai kitai di menoa din.


Kita tau meda ba http://guachalet.blogspot.com lalu penyampau bayar nya kita tau berunding enggau iya ke beempu endor tu. Nya alai barang sapa kitai ti bisi ati deka nginjau alai tu endor diau tauka ngereja pengawa berami besai tau nguji bejako enggau :
John Linang HP : +6019-8873222
E-mail : guachalet@gmail.com

3 comments:

  1. Manah info tu punggal. Terima kasih laban udah bekunsi penerang ditu.

    ReplyDelete
  2. manah amat utai dibantai nn tu, kitai mesti nyukong pemansang digaga bansa diri,,manah!

    ReplyDelete