Pengerindu Ke Pengeraja Asal Kitai Dayak / Iban

Aku berasai gaga bendar ati meda maioh bendar bala anembiak rebak baru diatu ke meruan rindu ke pengawa, adat, ngepan, main asal, serta maioh utai bukai ke besankut paut enggau Pengeraja Asal Kitai Dayak / Iban di menua kitai Sarawak jam ke diatu.

Ari aku ke selalu macha serta berati ke maioh bengkah randau bansa kitai Iban ba maioh bengkah portal forum Iban ba arus antarabangsa (Internet)tu nya alai aku lalu bulih runding ngaga blog ngena jako Iban kena mandang ke bansa kitai Iban tu bisi nyadi siti ari raban bansa di dunya tu ke endang tebilang ari kelia nyentok ke sehari tu lalu beberita serta di perbasa ke bansa enggau menua bukai dalam dunya laban ke maioh tegal baik nya berita ke manah tuaka berita ti enda ngelantang ke ati bansa kitai empu.

Bansa kitai Dayak Iban endang ditemu ngembuan maioh macham pengawa serta tegar bendar ngerekai berimba kelia mansang ba sebelah menua kitai di Malaysia ditu lalu enda salah enti aku nyebut kitai bansa Iban pan udah bisi di temu netap nyadi rakyat menua bukai ba menua tasik ke tegal ti nemu serta landik ngidup kediri lalu ulih semekih begulai lalu sebaka enggau rakyat menua nya ke endang udah jauh maju ari kitai Dayak Iban dulu kelia.

Bansa kitai Dayak Iban ari peneleba aku ke begulai enggau maioh bansa bukai ngelama tu mega sigi chukup di kenangi ke semua orang berengkah ari kelia nyentok ke sehari tu ketegal ti mutus ati ngereja pengawa ti nyentok ke bansa kitai Dayak Iban mudah pechah kaul enggau pangan diri ari jako umbok bansa bukai ke ka meda kitai enda begulai sejalai lalu kurang agi beberita banding ke enggau kelia menya.

Tang aku beterima kasih laban ketegal jako Pengerindu Ke Pengeraja Asal Kitai Dayak / Iban kitai ulih bekempit enggu pangan diri besulu begulai baru , besaum penemu ngiga jalai ngasoh Pengeraja Asal kitai nya lebih agi beberita ari ke udah lalu semampai di kenang semua orang di serata dunya sampai ke belama lama iya ila.

Aku minta ampun ngagai kita ke bisi beempu pengeraja pesaka bansa ke bisi di peda kena lansa aku ba post topic ke siti tu laban ke ngayan ke gambar nya nadai enggau pinta enggau tanya tang aku ke ngayan ke gambar nya ambi ke bisi dipeda serta di perati ke semua orang ari diatu nyentok ke dudi hari ila tang ukai ngayan ke gambar nya enggau niat ketegal ka ngayah tauka ka ngemalu ke kita. Terima kasih lalu aku arap ke kitai Dayak Iban begulai sejalai saum penemu nyadi satu belama.