October 23, 2009

PENEMUAI NGAGAI TAMAN NEGARA LOGAN BUNUT

Kira pukul satu lemai 22.10.2009 kami duai Indai Rosa nemuai ngagai kaban di Rumah Jawan, Sungai Kelabit, Bakong, Tinjar , Baram. Kami duai mupok kin nengah jalai ke nyimpang ngagai Jalai Taman Negara Logan Bunut tauka Jalai Long Lama, kira ke lima belas minit kitai ngena kereta ari Simpang Bekenu nuju ka Simpang Batu Niah.
Rindu bendar hati meda gaya rampa menua dia lalu maioh bendar buah dijual orang ba sepemanjai jalai ke dipansa. Rumah panjai kitai Iban pan maioh bendar dipeda kitai digaga ba tisi jalai lalu rumah panjai ba menua tu agi maioh digaga begantung ngena kayu. Kami duai mega sempat ngetu enda lama ba pasar Beluru, tauka bisi nya di kumbai sida dia pasar Bakong.
Sekumbang kami duai ke berandau enggau sida bini Tuai Rumah Jawan di Sungai Kelabit dia kami duai gaga bendar hati laban sida menyanak mai kami duai raun bejalai ngagai menua Lapok kira ke sejam setengah pejalai ngena kereta ari menua Sungai Kelabit, udah nya lalu raun terus ngagai Taman Negara Logan Bunut kira ke setengah jam ngena kereta ari pasar Lapok.
Lalu sepemanjai jalai nuju ngagai Lapok aku meda maioh bendar rumah panjai bansa Penan, kitai Iban, Kenyah enggau Berawan. Sida ba menua tu maioh bendar numboh ka kebun sawit kediri empu kena ngidup kediri nunda singkang pemansang kemaia tu hari. Sepemanjai jalai maioh bendar rumah orang digaga serta dipeda kitai ba tisi jalai lalu tau dikumbai kitai nadai puang menua nya dia.
Kira ke satu kilometer ari pasar Lapok kami mansa SMK Lapok ke nyau 90% ka tembu, lalu meda pemanah rampa menua dia.Ari ili pasar Lapok kitai ulih meda Logpond Sawmill Rimbunan Hijau lalu ari ulu pasar Lapok nya mega kitai ulih meda Logpond Sawmill Samling. Lalu gambar ke diambi aku, iya nya ari atas Jambatan Sungai Tinjar tauka Jambatan Lapok. Maia nya hari nyau udah lemai kira ke pukul lima, lalu kami datai ba Taman Negara Logan Bunut kira ke pukul enam lemai laban semampai ngetu leboh ke meda utai ke ngasoh hati rindu. Nasib ga ulih ngambi gambar ke dikunsi enggau bala pemacha baka ke di pandang ke aku ba blog tu.
Ba Taman Negara Logan Bunut tu bisi alai bemalam tang aku enda nemu berapa sewa semalam, lalu bisi mega perahu sewa kena kitai raun ngelingi Logan Bunut nya.. Ngena post tu aku mai kitai pemacha maioh ke bisi peluang tau sama nemuai kia laban Logan Bunut tu iya nya danau ke pengabis besai ba menua kitai lalu iya tau nyadi langkang serta ulih alai kitai bejalai ti maia leboh musim kemarau. Lalu Logan Bunut tu mega beberita maioh bendar ikan sungai ke jarang di temu kitai ke diau ba menua ili.

































http://johnadamgilbert.blogspot.com

4 comments:

  1. Just passing by your blog after getting your suggesstion from Facebook. I'll drop by again some other day. Have a nice day.

    ReplyDelete
  2. Thank you for your comment Sir, and wish you goodluck. May god bless you always.

    ReplyDelete
  3. Manah blog nuan tu laban ngena jaku Iban. Arapka nuan enda teruska ngemansangka blog tu ngena jaku Iban ngambika bisi kereban dibacha bala nembiak Iban ke ngambi subjek Bahasa Iban di sekula.

    ReplyDelete
  4. Terima Kasih uchutedung, sigi endang digaga aku ngena jako Iban lalu blog ke dua iti nya alai ke ditulis ngena English laban ari peminta bala maioh ke ka macha ngena English baka bala kaban aku ba Facebook. Bisi mega sida minta ke macha blog tu ka ngena Bahasa Melayu tang aku lalu bedau bisi hari ngelimpang ke diri nulis iya lalu terima kasih ke semua kopmen kita nya.

    ReplyDelete