Bejalai Ngagai Gua Niah

Tu kali ke lima aku udah bejalai ngagai Gua Niah. Gua Niah tu siti ari gua ti pengabis iya tuai lalu udah kala alai mensia diau kira 2000 tahun ke udah kelia. Maioh utai lama tauka artifacts ke di simpan ba Museum Kuching sigi di ambi ari Gua Niah ke nagasoh Museum Kuching nyadi tebilang serta ngembuan utai lama ke pengabis maioh enti di banding ke enggau museum bukai di menua Malaysia tu.






Pejalai kitai ari Miri ngagai Niah kira ke sejam ngena kereta. Udah nya kitai lalu nuju Taman Negara Niah ke nyadi alai kitai mesti melapur diri lalu bebayar RM10.00 siko ngagai opis taman negara dia. Udah kitai mayar dia kitai lalu nuju pengkalan ba tebing Sungai Niah alai kitai nepan boat kena nyemberai Sungai Niah lalu bayar siko penumpang iya nya seringgit.



Datai ba seberai nyin kitai lalu bejalai niti jalai ti di gaga ngena kayu belian sepemanjai kira ke sebatu tuaka pejalai kaki sejam. Gua Niah tu ke diatu nya nyadi ke penatai pemisi bala kitai Iban ari menua Tangap, Niah. Laban sida ngulih ke sarang burong layang layang dia serta mega enggau tai burong nya ti nyadi ke baja. Penyauh mua Gua Niah ari rumah panjai orang Tangap tauka SRK Tangap nya kira ke lima belas minit bejalai kaki. Ba serantu jalai kitai ka betemu enggau maioh temuai ari seluruh dunya tu tang ingat anang enda mai lampu pichit laban dalam gua tu petang taja pan jalai iya meruan berengkah ari mua gua - Gua Pasar nyentok ke Gua Lumbong 4.5 kilometer. Lalu bisi mega jalai darat kia iya nya ari Ladang Kosa tauka Ladang Kerambungan tang aku enda kala nengah jalai tu laban jalai enda manah enti hari hujan serta nangi enggai kediri tesat.



Enti kita ka nemuai kitu, kita tau angkat ari Miri tumu pagi laban enggai ke hari hujan laban enggai ke kita enda puas hati meda gaya utai ke nyelai dalam gua Niah tu. Lalu enti kita ka nguji niki lubang gua ke bisi alai orang nyimpan tajau ke alai orang nyimpan tulang orang mati kelia kita mesti nemu Rock Climbing laban tebing gua tu ti renjan serta bejelangkit ba batu enggau urat kayu. Nyadi gua tu di kumbai orang Gua Tulang, tang jalai gua tu sigi enda di kemendar ke sida taman negara alai kitai bejalai laban iya ti enda likun. Aku ka sekali udah niki kia lalu ba atas nyin aku betemu enggau orang ti benong ngulih ke sarang burong layang layang. Tang chukup sayau laban tajau nya udah pecah serta tulang kitai mensia tak ngachir, lalu bisi dua iti tajau ke bisi tulang nya. Peninggi lubang gua tu kira ke baka peninggi rumah sepuluh tingkat lalu semina orang ke berani serta landik niki tebing bukit aja tau kia. Leboh lemai hari rindu bendar meda bala entawai tauka kusing terbai mulai kediri tama ngagai gua nya lalu baka nya ga burong layang layang ke terbai beraban maioh tama pansut gua di peda kitai belama. Enti hari panas udah bekau hujan nya kitai rindu bendar meda gaya utai dalam gua nya ke nyau baka panchar spotlight lalu nyau baka ke bisi pengerami kenu ko gaya peda kitai ti maioh chura.



Lalu rumah panjai orang Tangap iya nya rumah panjai kitai Iban ti bansa lama serta digaga ari kayu lalu begantung ti jarang di peda kitai kemaia hari tu. Rumah sida tu betangkup lalu berimbai enggau sekula SRK Tangap. Pendai sida iya manah amat di gaga ngena kayu belian lalu Sungai Tangap nya kira ke sepuluh depa pemesai.