Kami lalu rembus ba Plaza Toll Rasau alai kami lalu nengah highway sampai ke kami nyau mansa simpang Tanjung Maya. Kami lalu "U" turn masuk simpang Tanjung Maya laban ngulih ke semak agi ngagai check point Kuala Lurah, Bekuni, Tutong (Sempadan Brunei / Limbang). Udah nya kami lalu ngetu baru ba check point Tedungan, Limbang (Sempadan Limbang / Brunei) alai kami lalu rembus ba menua Batu Danau, Limbang. Kami mansa pasar Limbang lalu meli minyak dia. Belanja minyak kena kami ari Miri ke Limbang semina RM29.00 aja.
Udah kami mansa pasar Limbang kami lalu ngetu ba check point Puni, Temburong (Sempandan Brunei / Limbang). Udah nya kami ngetu baru ba check point Pandaruan, Limbang (Sempadan Limbang / Brunei). Kami lalu mansa daerah Temburong ba menua Brunei. Udah nya baru kami ngetu baru ba check point Labu (Sempadan Brunei / Lawas). Udah ngejang ke nya kami ngetu baru ba check point Mengkalap, Lawas (Sempadan Lawas / Brunei).
Kami lalu merarau ba Lawas di bai kaban aku ari Ladang Baru Merapok Encik Awang Julaihi Suhanah enggau menyadi iya Awang Musa Suhanah. Udah merarau kami lalu mupok baru kira ke enda bulih setengah jam alai kami datai ba check point Merapok, Lawas (Sempadan Sarawak / Sabah) lalu ba alai ke sama kami lalu ngalih ngagai seberai lalu ngechop passport ba check point Sedumin, Sepitang (Sempadan Sabah / Sarawak).
Kami lalu mansa menua Sepitang / Beaufort / Membakut / Bongawan / Kimanis / Benoni / Papar / Kinarut / Putatan sampai ke Kota Kinabalu. Kami bemalam dia ba keluarga angkat aku di Kampung Tanjung Aru Lama Encik Hussin Yassin.
Pagi 01.06.2009 kami terus ke Kudat. Ba rantu jalai kami ngetu ngundang kaban aku Roland Liang ba Balai Polis Kota Belud udah nya kami lalu terus ngagai THE FIRST TIPS OF BORNEO "TANJUNG SIMPANG MENGAYAU". Rindu begambar dia udah nya kami lalu betemu enggau adek angkat aku Ismail Ahmad lalu di bai iya merarau di Kudat. Udah tembu Merarau kami lalu mulai kediri tang ngetu ba Kampung Sumangkap, Matunggong laban ka meli rengka asal kitai Iban iya nya setawak, gong, bebendai enggau engkerumong. Kami masuk kampung tu bebayar RM5.00 siko tang enda rugi laban kami bulih maggang rengka asal kitai nya enggau rega ke ngerindu ke hati. Pulai ari nya kami lalu terus ke Kota Kinabalu laban bala menyadi angkat aku Zaiton Ahmad sigi udah nganti mai makai ba Port View Seafood, Water Front semak Centre Point.
Hari siti 02.06.2009 kami lalu bejalai baru ngetu ba Tamu Tamparuli lalu bisi ngambi video dia serta enggau Jambatan Tamparuli. Udah ngirup pagi dia kami lalu mupok nanjak kaki Gunong Kinabalu lalu bisi ngetu ba Pekan Nabalu enda lama. Kami datai ba THE SECOND TIPS OF BORNEO "TAMAN NEGARA KINABALU" kira pukul 11 pagi lalu mayar RM3.00 siko. Aku lalu mai kami ngagai Timpohon Gate iya nya alai orang ti berlepas niki Mount Kinabalu. Ditu sida park warden terit amat enda baka kelia meresa orang ti ka niki tauka pulai ari Gunong nya. Ditu aku betemu enggau pangan aku serambau menya iya nya Flora Chill Duncan ti ke pengabis iya aku betemu enggau iya ba tahun 1980 di Saratok leboh ke sekula ba SMK Saratok.
Udah rindang meda utai ba Taman Kinabalu kami lalu ngagai Air Panas Poring, di Ranau lalu sempat mega mandi dia. Ditu kami bebayar baru masuk RM3.00 siko. Rindu mandi berendam ba ai angat tang nyau beranti laban kolam ti nyau berebut orang nganti gilir diri empu laban ke enggai kunsi kolam. Udah nya kami lalu pulai serta makai di Ranau. Apu rega mee goreng sepinggai RM6.00 lalu nasi ayam RM5.50. Udah makai kami lalu mulai kediri ke Kota Kinabalu baru. Nyadi baka nya gaya kami nemuai meda DOUBLE TIPS OF BORNEO iya nya Tanjung Simpang Mengayau enggau Taman Negara Kinabalu.
No comments:
Post a Comment