Bejalai Ngagai Pagoda Penang

Kena 29.03.2009 kami duai Indairosa bisi bejalai ngagai Pagoda Penang tauka iya di kumbai orang Kek Lok Sii Temple Pagoda. Penyauh iya ari Campbell Street kira ke setengah jam lalu ari Bukit Bendera tauka Penang Hill kira ke sepuluh minit. Pagoda tu berimbai enggau Bukit Bendera semina seduai tu enda di peda laban ti lindung bukit tang apartment ke ba kaki Bukit Bendera nya peda bendar ari Pagoda tu. Pagoda tu mega dikumbai orang ba Penang iya nya Kuil Tangga Seribu ti alai orang ti megai pengarap Budha besambiang.

Ari atas Pagoda tu kitai olih meda rampa menua Penang enggau terang sekali ti sema hari nadai ujan tauka bisi kabus. Lalu enti kita bisi mai camera ke bisi zoom tauka handycam kita olih zoom meda Jambatan Pulau Pinang enggau terang sekali. Sepemanjai jalai kita niki pagoda tu bisi maioh orang bejual sepemanjai jalai nya lalu datai kita ba kaki Pagoda tu mega maioh bendar tekura di simpan orang ba telaga ti nyau beserak pala sida gaga nerima penatai kitai kia. Nyadi anang muai peluang enti kita bisi raun ke Penang meda utai ti di ke nadai ke kitai di Sarawak ke manah di pandang ke orang ditu.